Այսօրվա Կառավարության նիստում գործադիրը հաստատեց «2026 թվականի ընթացքում Սևանա լճում ձկան և խեցգետնի արդյունագործական որսի չափաքանակները և ժամկետները, արդյունագործական որսի կազմակերպման պայմաններն ու պահանջները սահմանելու մասին» որոշման նախագիծը։
Շրջակա միջավայրի նախարարի տեղակալ Արա Մկրտչյանը գործադիրի քննարկմանը ներկայացրեց  որոշման նախագիծը։
Սույն որոշումով 2026 թվականի համար նախատեսվում է Սևանա լճում սիգի արդյունագործական որսի համար սահմանել 550 տոննա չափաքանակ, որսի իրականացման ժամկետը սահմանել սույն թվականի փետրվարի 6-ից մինչև նոյեմբերի 20-ը։
Այս իրավական ակտի մշակման համար հիմք է հանդիսացել ԳԱԱ Կենդանաբանության և հիդրոէկոլոգիայի գիտական կենտրոնի կողմից 2025 թվականին Սևանա լճում իրականացված հետազոտությունների արդյունքում ներկայացված հաշվետվությունը, որտեղ 2025 թվականի հոկտեմբերի դրությամբ Սևանա լճում սիգի ընդհանուր պաշարը կազմել է 3591.8 տոննա, որից արդյունագործական պաշարը կազմել է 1373.9 տոննա։
Գիտական կենտրոնը 2026 թվականի ամռանն կիրականացնի ուսումնասիրությունների երկրորդ փուլը, որի հիման վրա կսահմանվի հավելյալ չափաքանակ աշնանային որսաշրջանի համար։
Նախագծի ընդունմամբ կկանոնակարգվի Սևանա լճում կենսապաշարի օգտագործման և կայուն կառավարման ոլորտը։