Մեր տարածաշրջանը երկրագնդի ամենահարուստ կենսաբազմազանություն ունեցող էկոտարածաշրջաններից է։
Հայաստանում կենսաբազմազանության պահպանությունը հիմնականում իրականացվում է բնության հատուկ պահպանվող տարածքներում։
Հայաստանի բնության հատուկ պահպանվող տարածքների օրվա՝ սեպտեմբերի 13-ի առթիվ, այսօր շրջակա միջավայրի նախարարությունը ԵՄ անդամ երկրների դեսպանների համար նախաձեռնել էր գիտաճանաչողական այց Հայաստանի բնության թանգարան և «Խոր Վիրապ» արգելավայր։
Դեսպաններին ուղեկցել է Շրջակա միջավայրի նախարարի տեղակալ Աննա Մազմանյանը։
Այցը մեկնարկել է Շրջակա միջավայրի նախարարության ենթակայությամբ գործող «Հայաստանի բնության պետական թանգարան» ՊՈԱԿ-ում։ Թանգարանի չորս սրահներում ցուցադրվում են Հայաստանի Հանրապետության ֆլորայի և ֆաունայի հազվագյուտ նմուշներ։ Կարճ էքսկուրսի միջոցով հյուրերը ծանոթացել են Հայաստանի տարածքի լանդշաֆտային բազմազանության, բուսական և կենդանական աշխարհի յուրահատուկ (էնդեմիկ) ներկայացուցիչների ցուցանմուշներին։
Դեսպանների շրջայցը շարունակվել է «Խոր Վիրապ» արգելավայր այցով, որտեղ դեսպանները ծանոթացել են միջազգային նշանակություն ունեցող խոնավ տարածքի էկոհամակարգի, բուսական ու կենդանական աշխարհի` հատկապես ջրլող թռչունների ու դրանց ապրելավայրերի, հազվագյուտ բուսատեսակների ու դրանց աճելավայրերի պահպանության ռեժիմի առանձնահատկություններին։