Հանրապետությունում էկոլոգիական դաստիարակության ոլորտում իրականացվող աշխատանքներն առաջ մղելու, ինչպես նաև էկոկրթության մակարդակի բարձրացման նպատակով Շրջակա միջավայրի նախարարությունում շարունակվում են իրականացվել միջոցառումներ:
Եթե օձին չվնասենք, այն նախահարձակ չի լինի. oձերի ակտիվացման շրջանում այս և օձերին վերաբերող այլ թեմաների վերաբերյալ էկոկրթական-իրազեկման միջոցառում էր կազմակերպվել Հայաստանի բնության պետական թանգարանում։ Շրջակա միջավայրի նախարարության իրավախորհրդատու, սողունաբան Լևոն Աղասյանը միջոցառման մասնակիցներին տեղեկացրեց՝ ինչպե՞ս տարբերել օձերին, Հայատանում ի՞նչ օձեր են հանդիպում, ո՞րն է թունավոր, ո՞րը՝ ոչ, ի՞նչ անել դրանց տեսնելիս, խայթոցի դեպքում ինչպե՞ս վարվել, ի՞նչ օգնություն ցուցաբերել։
Այսպիսով՝
ՕՁԻՆ ՀԱՆԴԻՊԵԼԻՍ
-Խուճապի մի՛ մատնվեք,
-Կտրուկ շարժումներ մի՛ արեք. մնացե՛ք անշարժ,
-Մի՛ փորձեք հարվածել կամ վնասել,
-Համբերատար սպասեք. օձն ինքը կհեռանա։ 
ՕՁԻ ԽԱՅԹՈՑԻ ԴԵՊՔՈՒՄ 
-Անհապաղ դիմե՛ք բժշկի, 
-Չզբաղվե՛ք ինքնաբուժությամբ,
-Չկպչե՛ք վերքին, չփորձեք ինքնուրույն լուծել խնդիրը
-Չանե՛ք կտրուկ շարժումներ 
-Ընդունե՛ք մեծ քանակությամբ հեղուկ։
Հիշե՛ք՝ օձերը, ինչպես և ցանկացած կենդանի, էկոհամակարգի կարևոր բաղադրիչ են, ուստի՝ պահպանենք նրանց՝ չոչնչացնելով։ Կարմիր գրքում գրանցված օձերին ոչնչացնելը բնապահպանական իրավախախտում է, որի հետևանքով պատճառված վնասը փոխհատուցվում է օրենքով սահմանված կարգով։