ՄԱԿ-ի գրասենյակում տեղի ունեցավ «Հայաստանի կենսաբազմազանության ֆինանսավորման պլան» (BIOFIN) ծրագրի մեկնարկի միջոցառումը: Այս քառամյա ծրագիրը ֆինանսավորվում է Գլոբալ էկոլոգիական հիմնադրամի (ԳԷՀ) կողմից և իրականացվում ՄԱԶԾ հայաստանյան գրասենյակի կողմից։
Ծրագրի նպատակն է՝ մշակել կենսաբազմազանության ֆինանսավորման ազգային պլան, որը թույլ կտա բացահայտել կենսաբազմազանության պահպանման ֆինանսավորման բացերը և հնարավորությունները՝ ստեղծելով նախապայմաններ լրացուցիչ միջոցների հավաքագրման, առկա միջոցների օգտագործման արդյունավետության բարձրացնման և ֆինանսավորման նորարարական լուծումների կիրառման համար: Կենսաբազմազանության ֆինանսավորման ազգային պլանի մշակումը ոչ միայն կնպաստի Հայաստանի կողմից Կենսաբազմազանության մասին ՄԱԿ-ի կոնվենցիայի շրջանակում ստանձնած պարտավորությունների կատարմանը, այլ նաև hնարավորություն կընձեռի ցուցադրելու երկրի դերը համաշխարհային կոնտեքստում՝ որպես կենսաբազմազանության ֆինանսավորման արդյունավետ լուծումների մշակման և ցուցադրման առաջատար՝ հատկապես 2026թ. Կոնվենցիայի կողմերի 17-րդ համաժողովի հյուրընկալմանն ընդառաջ:
ՀՀ վարչապետի գլխավոր խորհրդական, Կենսաբանական բազմազանության մասին կոնվենցիայի կողմերի 17-րդ համաժողովի (COP 17) կազմկոմիտեի նախագահ Համբարձում Մաթևոսյանը, Հայաստանում ՄԱԶԾ մշտական ներկայացուցիչ Նաթիա Նացվլիշվիլին և Կենսաբազմազանության ֆինանսավորման նախաձեռնության գլոբալ թիմի անդամ, ՄԱԶԾ շրջակա միջավայրի գծով ֆինանսական վերլուծաբան Այնուր Շալախանովան ողջունեցին միջոցառման մասնակիցներին, որոնց թվում էին ոլորտի կարգավորմամբ զբաղվող պետական գերատեսչությունների, միջազգային ու հասարակական կազմակերպությունների, մասնավոր ֆինանսական կազմակերպությունների ներկայացուցիչներ և այլ շահագրգիռ կողմեր:
Հարց ու պատասխանի ընթացքում մասնակիցներն ընդգծեցին արոտավայրերի կարևորությունը որպես Հայաստանում կենսաբազմազանության համար կարևոր տարածքներ և նշեցին մասնավոր հատվածի ֆինանսավորում ներգրավելու նպատակով օրենսդրության և ինստիտուցիոնալ զարգացման անհրաժեշտության մասին: Առաջարկությունների թվում էր նորարարական գործիքների մշակումը, ինչպիսիք են ածխածնային կրեդիտները: Կենտրոնական բանկը նաև առաջարկեց տեխնիկական համագործակցություն՝ կենսաբազմազանության ֆինանսավորման լուծումներն իր առաջիկա Կանաչ պրոդուկտների շրջանակում ներառելու համար:
Բացի այդ, մասնակիցները կարևորեցին ագրոկենսաբազմազանությունը` ինչպես պահպանման, այնպես էլ գյուղական շրջաններում կենսապահովման տեսանկյունից: