Հարգելի՛ գործընկերներ,
Մայիսի 22-ն ամբողջ աշխարհում նշվում է որպես Կենսաբազմազանության միջազգային օր։ Հայաստանը միանում է Կենսաբազմազանության միջազգային օրվա համաշխարհային նախաձեռնությանը՝ հատուկ ընդգծելով, որ մեր երկիրը ընտրվել է ՄԱԿ-ի Կենսաբազմազանության հաջորդ համաժողովի (COP17) հյուրընկալող երկիր։
Այս կարևոր իրադարձության շրջանակում Շրջակա միջավայրի նախարարությունը նախաձեռնում է տեղեկատվական և հանրային իրազեկման լայնածավալ ծրագիր՝ նպատակ ունենալով վեր հանել Հայաստանի հարուստ կենսաբազմազանությունը, դրա պահպանման մարտահրավերներն ու լուծումները։
Ուստի, ոլորտի մասնագետներին, գիտական համայնքի ներկայացուցիչներին, բնապահպաններին և ստեղծագործական համայնքի ներկայացուցիչներին հրավիրում ենք համագործակցության և խնդրում իրենց ներդրումն ունենալ այս կարևոր առաքելության մեջ՝ նախարարությանը տրամադրելով հետևյալ նյութերը.
- Գիտական հոդվածներ և հետազոտություններ՝ կենսաբազմազանության, բնապահպանական մարտահրավերների, եզակի բուսական ու կենդանական տեսակների պահպանության վերաբերյալ,
- Վավերագրական և տեղեկատվական ֆիլմեր՝ որոնք արտացոլում ենՀայաստանի էկոհամակարգերը, բնության պահպանության հաջողված ծրագրերը, ինչպես նաև միջազգային փորձը,
- Տեսանյութեր և հարցազրույցներ՝ կենսաբազմազանության նշանակության, էկոլոգիական նախաձեռնությունների և ՄԱԿ-ի առաջիկա համաժողովի համատեքստում Հայաստանի դերի վերաբերյալ,
- Ֆոտոշարքեր և լուսանկարներ Հայաստանի եզակի բնաշխարհի, էնդեմիկ տեսակների, էկոլոգիական ծրագրերի կամ բնապահպանական խնդիրների լուսաբանմամբ։
Տրամադրված նյութերը կօգտագործվեն հետևյալ նպատակներով.
- Կենսաբազմազանության միջազգային օրվա միջոցառումների շրջանակում ցուցադրություններ, քննարկումներ և վերլուծություններ կազմակերպելու համար,
- ՄԱԿ-ի Կենսաբազմազանության համաժողովին ընդառաջ՝ միջազգային հանրությանը մեր ջանքերը տեսանելի դարձնելու համար,
- Հանրային իրազեկման արշավների մաս կազմելու համար՝ նպաստելով կենսաբազմազանության կարևորության ընդգծմանը։
Հեղինակային բոլոր իրավունքները պատշաճ կերպով կպահպանվեն։
Նյութերի ներկայացման վերջնաժամկետը՝ 2025 թվականի ապրիլի 15-ն է։
Նամակ-հայտերը կարող եք ուղարկել press@env.am էլեկտրոնային հասցեին նամակի միջոցով՝ գլխագրում նշելով «Կենսաբազմազանության օր»։
Լրացուցիչ մանրամասների համար կարող եք զանգահարել 011818555/5172 հեռախոսահամարով։