Նոյեմբերի 30-ին ՀՀ բնապահպանության նախարար Արծվիկ Մինասյանը հանդիպում է ունեցել «Հայաստանի զարգացման նախաձեռնություններ» /IDEA/ հիմնադրամի գլխավոր գործադիր տնօրեն Էդգար Մանուկյանի, Արցախի ծրագրի և Տաթևի զարգացման ծրագրի ղեկավարներ Սուրեն Ամիրբեկյանի ու Հայկ Թութունջյանի հետ: Քննարկվել են նախարարության և հիմնադրամի համատեղ իրականացվող ծրագրերն ու համագործակցության նոր հնարավորությունները: Շեշտադրումը,հիմնականում, արվել է «Դիլիջան» ազգային պարկում և Տաթևի զարգացման ծրագրում իրականացվող աշխատանքների վրա: Էդգար Մանուկյանը մանրամասնորեն ներկայացրել է Դիլիջանում և Տաթևում IDEA հիմնադրամի կատարած աշխատանքը: Նշվել է, որ ընթացքի մեջ են տեղերում համապատասխան տեղեկատվական կենտրոնների ստեղծման աշխատանքները, որոնք էկոտուրիզմի զարգացման առումով հսկայական նշանակություն կարող են ունենալ: Նախարար Արծվիկ Մինասյանը ողջունել է հիմնադրամի իրականացրած գործունեությունը, նշել, որ ցանկացած հարցում նախարարությունը պատրաստ է օժանդակությանըու համատեղ աշխատանքին: «Միանշանակ է, որ մեր համագործակցությունը պետք է խորանա և, ավելին եմ սպասում հիմնադրամից ու պատրաստակամ ենք ամբողջությամբ ներգարվվելու ծրագրերի իրականացման գործընթացներում»,-նշել է նախարարը` կարևորելով բիզնես մտածողության կիրառման անհրաժեշտությունը, ինչպես նաև ժամանակակից տեխնոլոգիական համակարգերի ներդրումը բնապահպանական գործընթացներում: Հանդիպման ընթացքում հիմնադրամի ներկայացուցիչները ներկայացրել են նաև «Տաթև» ազգային պարկ ստեղծելու կառավարության նախագծի շուրջ քննարկումներում պարկի կառավարման մոդելի վերաբերյալ իրենց նկատառումները:Որպես Սյունիքի մարզի զբոսաշրջության զարգացման առանցքային կենտրոններից մեկը՝ ազգային պարկի ստեղծումը կնպաստի համապատասխան ենթակառուցվածքների զարգացմանը՝ զգալիորեն բարելավելով նաև հարակից համայնքների սոցիալ-տնտեսական վիճակը: Այս համատեքստում ընդգծվելէ կառավարման մոդելի քննարկումներում պետություն-համայնք-մասնավոր հատված փոխգործակցության կարևորությունը: Արծվիկ Մինասյանը նաև տեղեկացրել է միջազգային համագործակցության ոլորտում նախարարության ներքո Դոնորների խորհրդի ձևավորման մասին, որին նաև ակտիվ մասնակցություն կարող է ցուցաբերել «Հայաստանի զարգացման նախաձեռնություններ» հիմնադրամը: Խորհրդի միջոցով հնարավոր կլինի ակտիվ մասնակցություն ունենալ մասնավոր ներդրումների ներգրավմանը, հսկողական մեխանիզմների կիրառմանը:Հանդիպման ավարտին պայմանավորվածություն է ձեռք բերվել սեղմ ժամկետներում քննարկված հարցերի առնչությամբ կոնկրետ գործողությունների իրականացման համար: