Հարգելի հայրենակիցներ ՀՀ բնապահպանության նախարարության և անձամբ իմ անունից շնորհավորում եմ բոլորիս կենսաբազմազանության միջազգային օրվա առթիվ: Կենսունակ էկոհամակարգերը և կենսաբազմազանությունը մարդկության գոյության կարևորագույն նախապայմաններից են, որոնք ընձեռում են հասարակության զարգացման և տնտեսական աճի լայն հնարավորություններ: Սոցիալ-տնտեսական զարգացման նպատակով կենսառեսուրսների կառավարումը պետք է լինի կշռադատված և շրջակա միջավայրի վրա ազդեցությունը հասցվի նվազագույնի: Կենսաբազմազանության պաշտպանության հրատապությունն ընդգծելու նպատակով 1993թ. ՄԱԿ-ն ընդունել է “Կենսաբազմազանության մասին” կոնվենցիան, որն ստորագրվել է աշխարհի ավելի քան 168 երկրների կողմից: ՀՀ-ն որպես միջազգային իրավունքի սուբյեկտ 1993թ. նույնպես վավերացրել է նշված կոնվենցիան և ստորագրել կենսաբազմազանության հետ կապված մի շարք բնապահպանական միջազգային համաձայնագրեր ու արձանագրություններ, որոնցով իր վրա է վերցրել որոշակի պարտականություններ: Վերջիններիս իրականացումը իրավամբ կնպաստի շրջակա միջավայրի և կենսաբազմազանության արդյունավետ պահպանությանը: “Կենսաբազմազանության մասին” կոնվենցիայի վավերացումը ՀՀ-ի կողմից տեղի է ունեցել 1993թ-ին` երկրի անցումային շրջանի առավել ծանր ժամանակահատվածում, երբ Հայաստանը զրկված էր կենսաապահովման տարրական միջոցներից: Սակայն, արդեն իսկ այդ ժամանակ ձևավորվել էր այն գաղափարը, որ Հայաստանի հարստությունը մեծապես կախված է կենսառեսուրսների առկայությունից, որոնք ընդերքի պաշարների հետ հավասարապես, երկրի համար հանդիսանում են ռազմավարական ռեսուրսներ: Քաջ գիտակցելով այդ, չնայած ծանր սոցիալ-տնտեսական իրավիճակին, ՀՀ կառավարությունը բնապահպանական և մասնավորապես` կենսաբազմազանության պահպանման հիմնախնդիրները, դասում է ազգային և պետական գերակայությունների շարքում: Այդպես կլինի նաև առաջիկայում և մեր բոլորի կողմից իրականացվող ուղղորդված աշխատանքները կտան իրենց արժանի արդյունքը: Մեկ անգամ ևս շնորհավորում եմ կենսաբազմազանության միջազգային օրվա առթիվ` կոչ անելով բոլորին լինել հոգատար մեզ շրջապատող բնության նկատմամբ և պահպանել այն հարուստ ու եզակի կենսաբազմազանությունը, որով օժտել է մեզ մայր բնությունը: ՀՀ բնապահպանության նախարար` Արամայիս Գրիգորյան
