Արարատյան հարթավայրի ապօրինի խորքային հորերի լոծարման և կոնսերվացման, ինչպես նաև խորքային ջրերի խնդրի կարգավորման ուղղությամբ կատարվող աշխատանքներն են քննարկվել ՀՀ բնապահպանության նախարարությունում անցկացված հերթական խորհրդակցության ընթացքում: Բնապահպանության նախարարի պաշտոնակատար Արամ Հարությունյանին տեղեկացվել է, որ ի կատարումն «Ապօրինի շահագործվող, ինչպես նաև չշահագործվող հորատանցքերի համար ջրօգտագործման թույլտվությունների տրման, դրանց լուծարման և կոնսերվացման կարգը հաստատելու մասին» ՀՀ կառավարության որոշման պահանջների՝ ավարտվել է Արարատյան հարթավայրում ջրօգտագործման թույլտվություն ստանալու նպատակով մինչև ապրիլի 1-ը դիմած տնտեսվարողներին ծանուցումներ ուղարկելու աշխատանքները: Վերջիններս պետք է ծանուցումը ստանալուց հետո մեկամսյա ժամկետում ներկայացնեն նոր հայտեր, որոնք առանձին-առանձին քննարկվելու են ձևավորված միջգերատեսչական հանձնաժողովում և եռամսյա ժամկետում եզրակացություն է տրվելու յուրաքանչյուր դիմումի վերաբերյալ: Բնապահպանության նախարարության համապատասխան ստորաբաժանումների ղեկավարները Արամ Հարությունյանին հայտնել են, որ ավարտվել են Արարատյան հարթավայրի խորքային հորերի հաշվառման և արդյունքների ամփոփման աշխատանքները: Այս փուլում ամփոփվել է ՀՀ Արմավիրի մարզի համայնքային պատկանելիության հորատանցքների հաշվառումը: Ուսումնասիրված 89 համայնքներում առկա են 1019 հորատանցք՝ 5,5 մ³/վրկ թողունակությամբ: Այս աշխատանքներին զուգահեռ շարունակվել են ապօրինի խորքային հորերի լուծարման և կոնսերվացման գործընթացը: Ապրիլի 22-ի դրությամբ ՀՀԱրարատիևԱրմավիրիմարզերում լուծարվել, կոնսերվացվել և բերվել են փականային ռեժիմի 79 հորատանցք: Արարատի մարզի Հովտաշատ համայնքում լուծարվել է մեկ հորատանցք, որը գտնվում էր ցամաքուրդում և չնայած անբարենպաստ պայմաններին՝ արվել է առավելագույնն աշխատանքները պատշաճ իրականացնելու համար: Խորհրդակցության ժամանակ զեկուցվել է, որ ընթանում են հողային նախապատրաստական աշխատանքներ ՀՀ բնապահպանության նախարարության համապատասխան ստորաբաժանման իրականացրած գույքագրման արդյունքում հաշվառված հորատանցքերի լուծարման կամ կոնսերվացման աշխատանքները շարունակելու համար:
