Փարիզում տեղի է ունեցել Քաղաքացիական ավիացիայի միջազգային կազմակերպության (ԻԿԱՕ) Եվրոպայի և հյուսիս ատլանտյան տարածաշրջանային գրասենյակի կողմից անցկացվող աերոնավիգացիոն պլանավորման օդերևութաբանական խմբի (METG/27) 27-րդ սեմինարը՝ «Քաղաքացիական ավիացիայի թռիչքների անվտանգության ապահովման հարցերը քաղաքացիական ավիացիայի օդերևութաբանական սպասարկման տեսանկյունից» խորագրի ներքո, որին մասնակցել է Եվրոպայի և ԱՊՀ 46 երկրից 65 պատվիրակություն: Միջոցառմանը մասնակցել է նաև ՀՀ բնապահպանության նախարարության «Զվարթնոց» ԱՕԿ ՓԲԸ տնօրենի պաշտոնակատար Ա.Մովսիսյանը և փոխտնօրեն Թ.Հայրապետյանը: Սեմինարը կազմակերպվել էր Քաղաքացիական Ավիացիայի Միջազգային Կազմակերպության (ICAO) Եվրոպայի և հյուսիս ատլանտյան տարածաշրջանային գրասենյակի կողմից: Սեմինարին ներկայացվել են եվրոպական երկրներում քաղաքացիական ավիացիայի օդերևութաբանական սպասարկմանն առնչվող գլոբալ խնդիրներ, քննարկվել են եվրոպական երկրներում <<Միասնական երկինք>> հայեցակարգի ներդրման աշխատանքներում օդերևութաբանական մարմինների աջակցությունը՝ կապված աերոնավիգացիայի օդերևութաբանական ապահովման զարգացման հետ: Մատուցվող ծառայությունների որակը, հուսալիությունը բարձրացնելու նպատակով առաջարկվել է օդերևութաբանական մարմինների կողմից OPMET միջազգային բանկեր ուղարկվող տեղեկատվությունը թվային տեսքով տրամադրել: Սեմինարի ամփոփման փուլում քաղաքացիական ավիացիայի թռիչքների անվտանգությունը օդերևութաբանական սպասարկման տեսանկյունից առավել անվտանգ դարձնելու համար, մի շարք երկրների` այդ թվում նաև Հայաստանի պատվիրակության կողմից ներկայացվել են մի շարք առաջարկություններ: «Զվարթնոց» ԱՕԿ ՓԲԸ կողմից քաղաքացիական ավիացիայի համար մշակվող և տրամադրվող օդերևութաբանական տեղեկությունների ճշգրտությունը կազմում է 92.5%, այս ցուցանիշը բարձր է տարածաշրջանի մի շարք երկրներից: Քաղաքացիական ավիացիայի օդերևութաբանական սպասարկմանն առնչվող հարցերին վերաբերող հաջորդ սեմինարը որոշվել է անցկացնել 2018թվականի սեպտեմբեր ամսին:
