ՀՀ բնապահպանության նախարար Արամ Հարությունյանի գլխավորած պատվիրակությունը Լեռնային Ղարաբաղ կատարած այցի շրջանակներում հանդիպել է ԼՂՀ կառավարությանն առնթեր շրջակա միջավայրի և բնական ռեսուրսների վարչության պետ Վազգեն Միքայելյանին: Հանդիպման ընթացքում քննարկվել են ջրային ռեսուրսների կառավարման, թափոնների անձնագրավորման, պոչամբարների փորձագիտական եզրակացություններ տրամադրելու մասին հարցեր: Կողմերը հաստատել են, որ նման հանդիպումները արդիական են, քանի որ Արցախում ոլորտը զարգացման միտում ունի: Առաջարկվել է քննարկել և ստեղծել 2013-2018թթ. համատեղ գործողությունների ծրագիր, որը նպատակաուղղված կլինի ոլորտի խնդիրների լուծմանն ու հետագա զարգացմանը: Քննարկվել են նաև օրենսդրության կարգավորման, բնության հատուկ պահպանվող տարածքների ստեղծման վերաբերյալ հարցեր: ՀՀ բնապահպանության նախարարը եղել է ՙԱրցախի երկրաբանական էքսպեդիցիա՚ կենտրոնում, որտեղ նախարար Հարությունյանը ծանոթացել է ներդրված տեխնիկային: Այն հնարավորություն կտա արցախցիներին երկրաբանական հետախուզական աշխատանքների որոշ արդյունքներ ստանալ տեղում: Արամ Հարությունյանը ծանոթացել է կենտրոնի ներուժին և հույս հայտնել, որ այդ կենտրոնը կխթանի հանքարդյունաբերության զարգացմանը Արցախում: Արամ Հարությունյանի հաջորդ կանգառը Դրմբոնի պղինձ-ոսկու հանքավայրն էր: Նախարարը ծանոթացել է հանքավայրի շահագործման ընթացիկ աշխատանքներին, արտադրական ծավալներին և պոչամբարների վերամշակմանը: Երեկ երեկոյան Արամ Հարությունյանի գլխավորած պատվիրակությունը վերադարձել է Հայաստան: Նշենք, որ նախարար Արամ Հարությունյանի գլխավորած պատվիրակության կազմում են եղել նախարարի տեղակալ Խաչիկ Հակոբյանը, իրավաբանական վարչության պետ Գարիկ Սարոյանը, ջրային ռեսուրսների կառավարման գործակալության պետ Վոլոդյա Նարիմանյանը և պաշտոնատար այլ անձինք: