Շրջակա միջավայրի նախարարության «ԲԾԻԳ» ՊՀ-ի կողմից, Կանաչ կլիմայի հիմնադրամի աջակցությամբ իրականացվող «Կանաչ կլիմայի հիմնադրամի հետ ծրագրային և գործընկերային շրջանակի կատարելագործում, երկրի երկարաժամկետ, ցածր ածխածնային զարգացման ռազմավարությունների հետ փոխկապակցում» պատրաստվածության ծրագրի շրջանակում մշակվել է կանաչ ֆինանսավորման իրականացման գործողությունների ծրագիր (2025–2027 թթ.)։
Այս գործընթացի մաս կազմեց նաև «Կանաչ ֆինանսավորումը Հայաստանում. կարգավորող շրջանակներ, գործընկերություններ և ներդրումների հեռանկարներ» թեմատիկ աշխատաժողովը, որին մասնակցեցին Շրջակա միջավայրի նախարարության, պետական մարմինների, ֆինանսական կառույցների, մասնավոր հատվածի և գործընկեր կազմակերպությունների ներկայացուցիչներ։
Աշխատաժողովի ընթացքում Շրջակա միջավայրի նախարարության կլիմայական քաղաքականության վարչության պետ Նոնա Բուդոյանը հանդես եկավ «Կանաչ ֆինանսավորման քաղաքական և կարգավորող միջավայրի ձևավորում Հայաստանում» թեմայով պանելային քննարկմամբ։ Նա ընդգծեց, որ Կառավարությունը հավանություն է տվել «Կլիմայի մասին» օրենքի նախագծին և հարակից օրենսդրական փաթեթին, որը իրավական հիմքեր կստեղծի ածխածնի կարգավորիչ և շուկայական մեխանիզմների ներդրման համար։
Նրա խոսքերով, այս մոտեցման հիմքում այն գաղափարն է, որ ածխածինը դառնում է շուկայական ապրանք։ Կարգավորիչ գործիքները սահմանում են ածխածնի գինն ուղղակիորեն, իսկ շուկայական մեխանիզմներն այն որոշում են առաջարկի և պահանջարկի միջոցով։
Նախատեսվող իրավական և ինստիտուցիոնալ փոփոխությունները հնարավորություն կտան ներդնել բոլոր համապատասխան մեխանիզմները, որոնք կխթանեն տնտեսվարողներին կատարել ներդրումներ տեխնոլոգիական արդիականացման ուղղությամբ և նվազեցնել արտանետումները։ Սա, իր հերթին, կնպաստի տնտեսության մրցունակության բարձրացմանը և կդարձնի Հայաստանը ավելի գրավիչ կանաչ ներդրումների համար։