Տեղի է ունեցել «Սևանա լճի շրջակա միջավայրի պահպանություն» ծրագրի համակարգման խորհրդի 8-րդ ամփոփիչ հանդիպումը:
Հանդիպման հիմնական նպատակն էր ներկայացնել իրականացված գործողությունների արդյունքները, քննարկել առկա ռազմավարական խնդիրները, մնացյալ գործողությունների իրականացման խոչընդոտները և դրանց հաղթահարման համար անհրաժեշտ քայլերը։
Նիստը մեկնարկել է Շրջակա միջավայրի նախարարի տեղակալ Արամ Մեյմարյանի՝ ողջույնի խոսքով։ Նախարարի տեղակալը շնորհակալություն է հայտնել գործընկերներին՝ Եվրոպական միությանը, Գերմանիայի Դաշնային Հանրապետությանը, GIZ-ին, ՄԱԿ-ի Զարգացման ծրագրին, ինչպես նաև տեղական և միջազգային բոլոր գործընկերներին, ովքեր այս տարիների ընթացքում իրենց ներդրումն են ունեցել ծրագրի իրականացման գործում։
Իր խոսքում Արամ Մեյմարյանն անդրադարձել է Ծրագրի ձեռքբերումներին՝ ինչպիսիք են Սևանա լճի կառավարման կարողությունների բարելավումը, մոնիթորինգի մեխանիզմների հզորացումը, կայուն հողօգտագործման և գյուղատնտեսության ոլորտում էկոհամակարգային ընդունելի մեթոդների ներդրումը, կոյուղաջրերի կառավարման ոլորտում փորձարկային լուծումների կիրառումը, ինչպես իրազեկման և կրթական միջոցառումներչը, որոնք իրականացվել են ծրագրի շրջանակներում՝ նպատակ ունենալով բարձրացնել հանրային գիտակցությունը շրջակա միջավայրի պահպանության վերաբերյալ։ Արամ Մեյմարյանը ընդգծել է, որ այսպիսի միջոցառումները ոչ միայն բարելավում են հասարակության տեղեկացվածությունը, այլև նպաստում են Սևանա լճի հիմնախնդիրների շուրջ հասարակական համախմնբավության ձևավորմանը։
Նախարարի տեղակալը նշել է, որ ծրագրի արդյունավետ իրականացումը թույլ է տվել որոշակի արդյունքներ գրանցել նաև համայնքների հետ համագործակցության առումով։ Նա ընդգծել է, որ տեղական համայնքների ակտիվ մասնակցությունը ծրագրին կարևոր դեր է խաղացել Սևանա լճի շրջակա միջավայրի պահպանության գործում, համայնքներն ավելի լավ են հասկացել էկոհամակարգի պահպանության կարևորությունը և պատրաստակամություն ցուցաբերել՝ աջակցելու ծրագրի նպատակներին։
Նախարարի տեղակալն իր խոսքն ավարտել է նշելով, որ դեռևս կան բազմաթիվ մարտահրավերներ, որոնք պահանջում են շարունակական ջանքեր՝ մասնավորապես կոյուղաջրերի կառավարման ոլորտում։
Ելույթներով հանդես են եկել Հայաստանում ԵՄ պատվիրակության համագործակցության բաժնի ղեկավար Ֆրանկ Հեսսը, Հայաստանում Գերմանիայի Դաշնային Հանրապետության դեսպանության տնտեսական համագործակցության և զարգացման բաժնի ղեկավար Կատրին Բուդեր-Փելցը, GIZ Հայաստանյան գրասենյակի ղեկավար Մադլեն Ռաուշենբերգերը, Հայաստանում ՄԱԶԾ մշտական ներկայացուցիչ Կոնստանտին Սոկուլսկին։
Ծրագրի իրականացման արդյունքների և ռազմավարական խնդիրները ներկայացրել են EU4Sevan ծրագրի թիմի ղեկավար Ալեքսանդր Առաքելյանը և EU4Sevan ծրագրի համակարգող Աստղիկ Դանիելյանը։
Նիստի ընթացքում քննարկվել են այն գործողությունները, որոնք դեռևս պետք է իրականացվեն՝ ըստ ծրագրի նախանշված անելիքների և ընդհանուր նպատակների։ Գործընկերները համաձայնել են, որ շարունակական համատեղ աշխատանքը բոլոր մակարդակներում՝ պետական, միջազգային և տեղական, կարևոր է ծրագրի հաջող ավարտի համար։
«Սևանա լճի շրջակա միջավայրի պահպանություն» (EU4Sevan) ծրագիրը համատեղ ֆինանսավորվում է Եվրոպական Միության և Գերմանիայի Դաշնային Հանրապետության տնտեսական համագործակցության և զարգացման նախարարություն կողմից։
Ծրագիրն իրականացվում է Գերմանիայի միջազգային համագործակցության ընկերության և ՄԱԿ-ի զարգացման ծրագրի կողմից: Ծրագրի գործընկերներն է ՀՀ շրջակա միջավայրի նախարարությունը, ինչպես նաև ՀՀ Էկոնոմիկայի նախարարությունը, որը պատասխանատու է գյուղատնտեսական հատվածի համար, և ՀՀ տարածքային կառավարման և ենթակառուցվածքների նախարարությունը, որը պատասխանատու է տեղական կառավարման և ենթակառուցվածքների համար։