Մարտի 24-ին կայացել է Օդերևութաբանության համաշխարհային օրվան և Հայաստանի Հանրապետությունում անտառագետի, ջրաբանի, օդերևութաբանի օրերին նվիրված հանդիսավոր նիստ, որի ընթացքում ամփոփվել են Շրջակա միջավայրի նախարարության «ՀայՀիդրոմետ» ՊՈԱԿ-ի 2024 թվականի գործունեության արդյունքները և ներկայացվել ձեռքբերումները։
Հանդիսավոր նիստին ելույթներով հանդես են եկել Շրջակա միջավայրի նախարարի տեղակալ Տիգրան Գաբրիելյանը, «ՀայՀիդրոմետ» ՊՈԱԿ-ի տնօրեն Լևոն Ազիզյանը, և «ՀայՀիդրոմետ» ՊՈԱԿ-ի գործընկերները։
Իր շնորհավորական ուղերձում նախարարի տեղակալ Տիգրան Գաբրիելյանը շնորհակալություն է հայտնել բոլոր այն մարդկանց ու գործընկերներին, ում ջանքերի շնորհիվ ոլորտը զարգացում է ապրում։ Նախարարի տեղակալն անդրադարձել է նաև վաղ նախազգուշացման համակարգի ներդրմանն ու զարգացմանն ուղղված քայլերի.
«Կլիմայական աղետների դարաշրջանում յուրաքանչյուր մարդ պետք է պաշտպանված լինի եղանակային վտանգավոր երևույթներից՝ վաղ նախազգուշացման համակարգերի միջոցով։ Այդ իսկ պատճառով էլ, այս տարվա Համաշխարհային Օդերևութաբանական Կազմակերպության կարգախոսն է՝ «Միասին հաղթահարելով վաղ նախազգուշացման բացերը»։
Շրջակա միջավայրի նախարարության ԲԾԻԳ-ի կողմից ակտիվ աշխատանքներ են տարվում «Կլիմայի փոփոխությամբ պայմանավորված բնական աղետների հանդեպ հարմարվողականության բարձրացում՝ մշտադիտարկման և վաղ նախազգուշացման համակարգի հզորացման միջոցով» ծրագրային հայեցակարգի լրամշակման ուղղությամբ, ինչպես նաև Կանաչ կլիմայի հիմնադրամին վերջնական ծրագրային առաջարկի ներկայացման համար ինչը հնարավորություն կտա էապես բարելավել «Հայհիդրոմետ»-ի կարողությունները վաղ նախազգուշացման համակարգերի ոլորտում»,-իր ելույթում նշել է նախարարի տեղակալը։
ՊՈԱԿ-ի տնօերն Լևոն Ազիզյանը ներկայացրել «ՀայՀիդրոմետ» ՊՈԱԿ-ի 2024 թ. գործունեության հիմնական արդյունքները և ձեռքբերումները.
-ՀՀ պետական բյուջեի միջոցների հաշվին ձեռք է բերվել և տեղադրվել 9 ավտոմատ օդերևութաբանական կայան, իսկ 23 ավտոմատ օդերևութաբանական կայաններ համալրվել են ձյան ծածկույթի բարձրության, մինչև 80սմ խորությամբ հողի խոնավության և հողի ջերմաստիճանի տվիչներով։
- Տեղադրվել են Ճապոնիայի կառավարության կողմից ֆինանսավորվող և ՄԱԶԾ կողմից իրականացվող ծրագրի շրջանակներում ձեռք բերված 2 օդերևութաբանական արբանյակային ալեհավաքներ և 2 սերվերներ, որոնց միջոցով հնարավորություն է ընձեռվել երրորդ սերնդի Meteosat արբանյակից ստանալ եղանակի 3D պատկերներ՝ ջերմաստիճանի, ջրային գոլորշիների ամպամածության և այլ օդերևութաբանական տարրերի վերաբերյալ:
- ԵՄ-ն Սևանի համար ծրագրի աջակցությամբ հիդրոլոգիական դիտակետերի համար ձեռք են բերվել 5 ջրաչափական պտուտաններ, ինչպես նաև մեկ ավտոմատ օդերևութաբանական կայան։ Կայանը տեղադրվել է Սևանա լճի առափնյա գոտում, և համալրված է նաև ջրային մակերևույթից գոլորշացման հաշվարկման տվիչով՝ Սևանա լճի ջրի գոշորշացման գնահատման նպատակով։
- ԱՄՆ ՄԶԳ «Հայաստանի ջրային ռեսուրսների կառավարման բարելավում» ծրագրի շրջանակում Գեղամավան և Ծովինար հիդրոլոգիական դիտակետերում տեղադրվել են ջրի մակարդակի դիտարկումների ռադարային ավտոմատ կայաններ։
- ՊՈԱԿ-ի և Գերմանիայի շրջակա միջավայրի հետազոտության Հելմհոլց կենտրոնի միջև կնքված համագործակցության համաձայնագրի շրջանականերում տեղադրվել են անձրևաջրերի հավաքաման թվով 7 սարքավորումներ:
- Մթնոլորտային օդի որակի մոնիթորինգի համակարգի արդիականացման նպատակով, պետական ֆինանսավորմամբ, 2024 թվականին ձեռք է բերվել օդի որակի մոնիթորինգի երկու ավտոմատ դիտակայան։ Դիտակայանները արդեն գտնվում են Երևանում, ներկայումս Երևանի քաղաքապետարանի հետ համատեղ ընթանում են տեղանքի նախապատրաստական աշխատանքները, որից հետո կտեղադրվեն և կհանձնվեն շահագործման։
- Արդիականացումը հնարավորություն կընձեռնի իրական ժամանակում ճշգրիտ չափել օդի հիմնական աղտոտիչները, ներառյալ փոշու տարանջատված մասնիկները՝ PM2.5 և PM10, ազոտի և ծծմբի երկօքսիդները, ածխածնի մոնօքսիդը, գետնամերձ օզոնը:
- 2024 թվականից սկսած պետական ֆինանսավորման տրամադրման արդյունքում հնարավոր դարձավ Սևանա լճի 3 դիտակետում իրականացնել ջրի որակի ֆիզիկաքիմիական և հիդրոկենսաբանական մոնիթորինգ ամսական հաճախականությամբ։
Միջոցառման ընթացքում ներկայացվել է Armhydromet բջջային հավելվածը։
Մասնագիտական տոների կապակցությամբ «ՀայՀիդրոմետ» ՊՈԱԿ-ի մի շարք աշխատակիցների ՊՈԱԿ-ի տնօրենի կողմից աշխատանքային պարտականությունները բարեխղճորեն կատարելու համար շնորհակալագրեր և պատվոգրեր են հանձնվել։
Միջոցառումն ամփոփվել է ավելի վաղ հայտարարված թեմատիկ մրցույթի հաղթող երեխաների պարգևատրմամբ։