Նոյեմբերի 21-ին «ԵՄ-ն կլիմայի համար» ծրագրի շրջանակներում տեղի ունեցավ Հայաստանի Հանրապետության «Կլիմայի մասին օրենքի» նախագծի վերաբերյալ ազգային աշխատաժողովը
Աշխատաժողովի նպատակն էր քննարկել ԵՄ և ԱլԳ երկրներում կլիմայի մասին օրենքների փորձառությունը, կլիմայական քաղաքականության միջազգային օրենսդրական կարգավորումները, «ԵՄ-ն կլիմայի համար» ծրագրի ներքո մշակված ՀՀ «Կլիմայի մասին օրենքի» նախագիծը, դրա ինստիտուցիոնալ կառուցվածքը և կարգավորող շրջանակը, կլիմայական ֆինանսավորումը և ածխածնի գնագոյացման հնարավորությունները Հայաստանում։
Աշխատաժողովի մասնակիցներին ողջունել են Հայաստանում ԵՄ պատվիրակության ղեկավար, դեսպան Վասիլիս Մարագոսը, ՄԱԿ-ի Զարգացման ծրագրի Մշտական ներկայացուցիչ Նաթիա Նացվլիշվիլին, Շրջակա միջավայրի նախարարության Կլիմայական քաղաքականության վարչության պետ Նոնա Բուդոյանը։
«Կլիմայի մասին օրենքը էական նշանակություն ունի, քանի որ կլիմայական գործողությունների, համակարգման և ներդրումների ներգրավման համար անհրաժեշտ է իրավական շրջանակ: Մենք ուրախ ենք համագործակցել Կառավարության և ՄԱԿ-ի Զարգացման ծրագրի հետ «ԵՄ-ն կլիմայի համար ծրագրի» շրջանակներում և վերահաստատում ենք մեր պատրաստակամությունը՝ աջակցելու օրենքի հետագա գործընթացին»,-նշել է Հայաստանում ԵՄ պատվիրակության ղեկավար, դեսպան Վասիլիս Մարագոսը։
«Հայաստանի կլիմայի մասին օրենքը իրավական հիմքեր կապահովի արդյունավետ կլիմայական քաղաքականությունների մշակելու և իրականացնելու, այդ նպատակով ֆինանսական ռեսուրսների հավաքագրելու, կլիմայական նկատառումները ոլորտային քաղաքականություններում ներառելու և կլիմայական ֆինանսավորումը հանրային ֆինանսների կառավարման համակարգում ներկառուցելու համար», - նշել է Հայաստանում ՄԱԶԾ Մշտական ներկայացուցիչ Նաթիա Նացվլիշվիլին:
Շրջակա միջավայրի նախարարության անունից Նոնա Բուդոյանը երախտագիտություն է հայտնել Հայաստանում ՄԱԶԾ գրասենյակին «Կլիմայի մասին օրենքի» նախագծի մշակմանն աջակցելու համար՝ ընդգծելով դրա կարգավորիչ դերը կլիմայական քաղաքականությունների առաջմղման գործում և հույս հայտնեց այս գործընթացում հետագա համագործակցության համար:
Միջոցառմանը մասնակցել են ավելի քան 50 ներկայացուցիչներ Եվրոպական հանձնաժողովից, Հայաստանում ՄԱԶԾ գրասենյակից, ՀՀ շրջակա միջավայրի, տարածքային կառավարման և ենթակառուցվածքների, էկոնոմիկայի, ֆինանսների և առողջապահության նախարարություններից, միջազգային կազմակերպություններից, օտարերկրյա և տեղական փորձագետներ: