Շրջակա միջավայրի նախարարի տեղակալ Արա Մկրտչյանն աշխատանքային այցով եղել է նախարարության ենթակայությամբ գործող «Բնապահպանական ծրագրերի իրականացման գրասենյակ» ՊՀ-ում:
Նախարարի տեղակալը շրջայց է կատարել գրասենյակի տարածքում, ծանոթացել գրասենյակային և աշխատանքային պայմաններին, հուզող հարցերի շուրջ զրուցել աշխատակիցների հետ։
Շրջայցի ավարտից հետո նախարարի տեղակալը հանդիպում-քննարկում է անցկացրել ստորաբաժանումների ղեկավարների և աշխատակիցների հետ՝ ծանոթանալու իրականացվող և նախատեսվող ծրագրերի ընթացքին և արդյունքներին։
Գրասենյակի տնօրեն Արմեն Եսոյանը և տարբեր ստորաբաժանումների ղեկավարներ նախարարի տեղակալ Արա Մկրտչյանին են ներկայացրել ծրագրերի ընթացքը։
Նախարարի տեղակալը կարևորել է շրջակա միջավայրի պահպանության ոլորտում իրականացվող ծրագրերի անխափան ընթացքը և հատկապես դրանց վերջնարդյունքը՝ ընդգծելով, որ յուրաքանչյուր ծրագիր ուղղված է Հայաստանի Հանրապետությունում էկոլոգիական իրավիճակի բարելավմանը և քաղաքացիների կյանքի որակի բարձրացմանը։
Նրա խոսքով՝ այդ ծրագրերի հաջող իրականացումը և արդյունքները ոչ միայն կնպաստեն շրջակա միջավայրի պահպանությանն ու բնական պաշարների կայուն օգտագործմանը, այլև կամրապնդեն պետական մարմինների և հասարակության միջև համագործակցությունը՝ ընդհանուր նպատակների իրագործման համար։ Մկրտչյանը նշել է, որ յուրաքանչյուր ծրագրի վերջնարդյունքը պետք է լինի տեսանելի և շոշափելի՝ ապահովելով երկարաժամկետ դրական ազդեցություն շրջակա միջավայրի և քաղաքացիների կյանքի որակի բարելավման վրա։
Հանդիպման ավարտին նախարարի տեղակալը հանձնարարել է առանձնահատուկ ուշադրություն դարձնել ծրագրերի ընթացքին, ժամանակացույցի պահպանմանը և վերջնարդյունքի արդյունավետության գնահատմանը։