Երիտասարդության միջազգային օրվա կապակցությամբ «Հայհիդրոմետ» ՊՈԱԿ-ի Օրհուս կենտրոնում կայացավ «Բնապահպանական խնդիրների լուծումները երիտասարդների պատկերացմամբ» խորագրով գաղափարների աշխատարան։
Միջոցառմանը մասնակցեցին Շրջակա միջավայրի և ԿԳՄՍ նախարարությունների ներկայացուցիչներ, ՅՈՒՆԻՍԵՖ-ի և Թումո լաբի մասնագետներ, ինչպես նաև «Ապահով Անկյուն» սոցիալ-կրթական ՀԿ-ի երիտասարդներ։
Աշխատարանի նպատակն էր խթանել երիտասարդների էկոլոգիական մտածողությունը և ստեղծել բաց հարթակ, որտեղ նրանք կարող են բարձրաձայնել իրենց համայնքների բնապահպանական խնդիրները և առաջարկել նորարարական լուծումներ։
Այս տարվա Երիտասարդության միջազգային օրվա թեման՝ «Տեղական երիտասարդական նախաձեռնություններ կայուն զարգացման նպատակներին և ավելիին հասնելու համար», հիշեցնում է, որ երիտասարդները միայն ապագայի ռեսուրս չեն, այլև ներկայի ձևավորողներ՝ համայնքային առաջնորդության, նորարարության և փոփոխության ակտիվ գործիչներ։
Միջոցառման ընթացքում նախարարության ներկայացուցիչները ներկայացրել են Օրհուս կենտրոնի դերը՝ երիտասարդներին բնապահպանական գործընթացներում ներգրավելու և նրանց իրազեկությունը բարձրացնելու գործում։ Խոսվեց նաև Օրհուսի կոնվենցիայի և օզոնային շերտի պահպանության ոլորտում երիտասարդների հնարավորությունների մասին։
«Ապահով Անկյուն» ՀԿ-ի երիտասարդները ներկայացրին իրենց կազմակերպության բնապահպանական ծրագրերը և համայնքային խնդիրների լուծման սեփական տեսլականը։
Քննարկումների առանցքում էր այն համոզմունքը, որ բնապահպանական խնդիրների վերաբերյալ իրազեկվածության բարձրացումը, հմտությունների զարգացումը և երիտասարդների ակտիվ ներգրավվածությունը երկարաժամկետ ներդրում են կայուն ապագայի համար։